U susret Svetom Jeronimu, Don Siniša Jozić: Biti otvoreni jedni prema drugima

U susret Svetom Jeronimu, Don Siniša Jozić: Biti otvoreni jedni prema drugima

3
Podijeli

Na blagdan Svetog Jeronima, nebeskog zaštitnika grada i župe Herceg Novi, u nedjelju, 30. septembra, u župnoj crkvi u Starom gradu slaviće se svete mise u 10 i 18 h i pjevati tradicionalna zahvalnica (Te Deum – Tebe Boga hvalimo), u spomen na oslobođenje grada.

Uoči blagdana, večeras biće služena misa s molitvom večernje u čast Sv. Jeronima, u 18 sati. Mise će služiti novi župnik u Sv. Jeronimu, don Siniša Jozić.

Picerija i restoran

On je, nakon dvije godine provedene u crkvi Sv Ane u Đurićima, za župnika postavljen početkom avgusta, “naslijedivši” don Nika Sošića.

Sveštenik je već 6 godina, a ovo je druga župa koju vodi nakon postdiplomskih studija u Rimu, gdje privodi kraju doktorat iz pastoralne teologije, priča za Radio Jadran:

– Ovo je novo iskustvo, jer Herceg Novi jeste izazov sa svojim svecima i konfiguracijom terena i ljepota, ali pogotovo ljudi. U imenu Sv Leopolda želim živjeti i nasljedovati njegov primjer, njegovu skromnost i blizinu sa ljudima, a u tom svjetlu i kontekstu i jeste moja misija ovdje. Biti primalac i svjedok da ovdje postojimo i mi katolici. Ovdje sam zato i poslat, da primam hodočasnike i turiste -priča nam don Jozić.

Osim toga, kako kaže, poslanje katoličke crkve u gradu nije samo za domaće katolike, već i za braću pravoslavce, kako bi se vidjela otvorenost i prema drugima, ali i govorilo o primjeru, svetosti i životu Sv Leopolda:

– U tom kontekstu nekako želim i usmjeriti svoje poslanje i misiju u ovoj župi i gradu. Htio ili ne, mi smo na to poslanje poslani. Jer, Sv Leopold je živio na ovom prostoru, ali njegov ekumenizam nije bio “školovani”, ne iščitava se iz knjiga, već ekumenizam koji je polazio iz naroda. Ovuda je prolazila granica Rimskog carstva, spajaju se Istok i Zapad. Sv Leopold je tu i uočio tu nit jako važnu – da Istok i Zapad ovdje dolaze do jedinstva, spajaju se u jedno. Istovremeno, dolazi i do rascjepa, ali ovisi o čovjeku, da li na to gleda kao na čašu koja je polupuna ili poluprazna. Ja to gledam kroz primjer našeg sveca. Ovo jeste mjesto susreta kultura i vjera, jer ekumenizam jeste jedinstvo prema Bogu i ne znači “mi vama ili vi nama”. Svi smo pozvani na jedno u Kristu i kad je tako, poslani smo zapravo jedni drugima. I to je ekumenizam – biti otvoreni jedni prema drugima – obrazlaže don Jozić.

Novi župnik crkve Sv Jeronima, u čijoj je blizini i crkvica Sv Leopolda, podsjetio da se sveta pjesma „Te Deum“ neprekidno pjeva od 1687. godine, kada je Herceg Novi oslobođen od Turaka, a opći providur i vojskovođa podigao crkvu Sv. Jeronima u čast istoimenom svecu i zaštitniku grada.

Don Jozić služiće sve tri mise, budući da će to biti prilika da se na ovaj važan blagdan  predstavi ne samo katoličkim vjernicima, već i svima drugima koji žele ophoditi crkvu.

3 Komentari

Ostavite komentar

*

code