Iz Mašove kužine: Bokeljsko božićno slatko

Jedna od bokeljskih poveznca na Badnjak bilo je i Bokeško božićno slatko, danas zaboravljeno. Prije nekoliko godina obnovljeno je u sklopu manifestacije “Žućenica fest”, prema staroj recepturi, na sreću sačuvanoj u Italiji.

Riječ je kuhanoj pšenici sa cukrom, ili medom,  kojoj se dodaje suho voće: kajsije, suhice, smokve, a menduli i šipak daju naročitu simboliku ovoj poslastici. Svaki sastojak je iz hrišćanske ili paganske simbolike i čini dio vjerovanja i tradicije.

Potrebno je:
2 ćikare pšenice
1,5 ćikara cukra (ili ćikara meda)
30 dag suhih armelinki – kajsija
10 dag suhica
20 dag suhih, isjeckanih smokava
10 datula bez špice (ako ima)
2 bićerina likera rozulina (liker od ruža)
20 oguljenih mendula
Kućarin kanele
Kućarin mljevenih klinčića
Ćikara zrna od šipka

Priprema:
Kuhati pšenicu, pa pred kraj kuhanja dodati suho voće. Nastaviti kuhanje miješajući, a kada se slatko zgusne ohladiti ga i umiješati rozulin, kanelu i klinčiće. Servirati na pijadelu i posuti zrnima šipka i mendulima. Ukrasiti fetama naranče i limuna.